افكار لأجتماع الشباب بالكنيسة
اولاً :
لازم نعترف بأن الشباب هم مستقبل الكنيسة , وان الكنيسة بدون شباب امرأة عاقل لا تلد , فالأهتمام بالشباب هو الاهتمام بالعمود الفقرى للكنيسة . انا اتمنى طبعاً ان كل الكنائس تهتم بأجتماعات الشباب علشان كدة انا فكرت فى الموقع دة علشان يكون اداء تساعد الشباب انهم يتبادلوا الأفكار .
فى الموضوع دة انا عاوز اركز على التجديد و قتل الروتين
الشباب هم طاقة جبارة , الشباب مش بيحبوا الروتين خالص فى الاجتماعات
و يعنى انت كأمين اجتماع شباب مفروض عليك تفكر كل اجتماع تعمل حاجة جديدة وتقدمها للشباب , انا عاوزك وانت بتعد لأجتماع الشباب تخلى الشباب يتشوقوا للأجتماع ويفكروا مع نفسهم يا ترى اية الجديد اللى هيقدمة اجتماع الشباب النهاردة .
لو قدرت تحافظ على تجديد الاجتماع هتجذب عدد كبير , فأول حاجة تركز عليها فى خدمتك للشباب هى التجديد المستمر .
لكن التجديد دة لية شروط :
يعنى العقيدة ثابتة ولا تتغير لأنها تخص الله والله لا يتغير , فأنت بتقدم العقيدة بطريقة جديدة مش بتجدد فى العقيدة دة فرق كبير اوى .
كمان الطقس ثابت مش بيتغير الا بقرار من المجمع المقدس فأنت مش بتجدد فى الطقس على هواك وانما انت بتقدم الطقس فى صورة جديدة
كمان الكتاب المقدس واقوال الاباء دى ثابتة يعنى مش ينفع اجدد فى ايات الكتاب المقدس لكن ممكن اقدمها بصورة جديدة وكذلك الأمر بخصوص اقوال الاباء نقدمها للشباب فى صورة جديدة .
يبقا احنا بنجدد طريقة التقديم مش المادة نفسها .
يعنى الاكل هو هو ولكن احنا بنقدمة للضيوف فى شكل مختلف عن الأول .
على فكرة ممكن الأكل يكون ممتاز و رائع ولكن بسبب اهمالك فى طريقة التقديم بتسد نفس الناس اللى بتاكل , وممكن يكون الاكل بسيط لكن بطريقة التقديم الجميلة هتخلى الكل مبسوط منة .
نشكر ربنا ان كنيستنا مليانة كنوز جبارة يعنى انت الكنوز والجواهر عندك يلا قدمها بصورة جديدة للشباب .
دى عبارة عن سلسلة من الموضوعات كل يوم هتكلم عن فكرة جديدة لتطوير اجتماعات الشباب . يبقا النهاردة لازم تعرف ان التجديد هو الحل لتطوير اجتماعات الشباب .
ابن الأنبا رافائيل
0 التعليقات
