اسكتش عن التجلي والقيامة

اسكتشات مسيحية مكتوبة

* يدخل بطرس وهو مرتدي جاكت طويل وصندل ويصعد علي المنصة ليواجه الصحفيين(كلما زاد عدد الصحفيين كلما كان هذا أفضل ويمكن التحكم في العدد بحسب الاحتياج) ويبدأ بالحديث

بطرس: صباح الخير ..اسمي سمعان بن يونا وأنا زي ما حضراتكم تعرفوا  رسول ليسوع المسيح …أنا طلبت عقد المؤتمر الصحفي ده لأن ……..

صحفي (مقاطعا): بطرس …أنت مش مكسوف تقول علي يسوع ده انه المسيّح بعد ما مات الموتة البشعة اللي هو ماتها دي؟؟

بطرس: أنا آسف أنا افتكرت حضرتك تعرف.

الصحفي : أعرف ؟؟ أعرف ايه؟؟

بطرس: يسوع قام من الموت …وفيه ناس كتير شافته.

الصحفي : بس رئيس الكهنة في أوروشليم قال ان ده كذب واشاعات.

بطرس: كان ممكن نصدق الكذبة دي لو اللي شافوه واحد أو اتنين بس دول مئات وبعدين…..لو يسوع كان مسيّا مزيف ليه أي حد هيتبعه ويمشي معاه؟ بالإضافة لكده لسه من يومين حوالي 5000 شخص آمنوا بيه كمخلص شخصي ليهم تقدروا تسألوهم وتستفسروا منهم هتعرفوا ان اللي شافوه …شافوه هو بنفسه فعلا …مش هتلاقوا اتنين منهم بيقولوا نفس القصة بس كلهم متفقين علي انهم شافوه حي…….علي العموم مش هوه دا السبب اللي أنا دعيت للمؤتمر عشانه …أنا عاوز أتكلم عن حاجة حصلت من فترة واحنا كنا أقسمنا انها هتفضل سر.

ص2 : من فترة يعني قبل الصلب؟؟

بطرس: قبل أيام من صلب يسوع….أخدني أنا ويعقوب ويوحنا لقمة جبل واحنا افتكرنا انه واخدنا هناك عشان يصلي زي ما كان متعود يعمل…بس اللي حصل كان حاجة غريبة …احنا شفنا عمود السحاب اللي مشي فوق خيمة الاجتماع 40 سنة في البرية…وبعدين لقينا يسوع بدأ يلمع..

ص3: تقصد ايه بأن يسوع كان بيلمع؟؟

بطرس: أقصد ان وشه وهدومه بقت منورة زي الشمس وبعدين سمعنا صوت من السما بيقول “هذا هو ابني الحبيب الذي به سررت” .. ومرة واحدة لقينا موسي وايليا ظهروا منعرفش منين.

ص3: معلش …حاسب لو سمحت ….بتقول شفت موسي ؟؟ازاي؟؟ موسي ده مات من مئات السنين؟ ازاي تقول انك شفته؟؟

بطرس: ما هو دا اللي أنا عاوز أقول لكوا عليه …يسوع أخدنا فوق الجبل عشان نشوف شكل ملكوت الله.

ص3: قصدك تقول ان موسي وايليا عايشين وأحياء في ملكوت الله؟؟

بطرس: أيوه . بالظبط.

ص3: عايشين ؟؟ دلوقتي؟؟

بطرس: أي نعم.

ص3: بس معلمي الشريعة طول عمرهم بيعلمونا انه لما الواحد يموت بيفضل ميت لغاية ما ربنا ييجي ويفتدي شعبه.

بطرس: يبقي معلمي الشريعة كانوا غلطانين لأني شفت موسي وشفت ايليا وهما الاتنين كانوا أحياء .أنا متأكد.

ص3 : أنا ممكن أصدق انك شفت ايليا لأنه مماتش لكن خطفته المركبات النارية ، بس موسي ؟؟ ….موسي مات قبل ما يعدي الناحية التانية من نهر الأردن؟ يبقي ازاي ممكن تشوفه؟؟

بطرس: أنا متهيألي هوه دا السبب اللي خلي يسوع يورينا موسي وايليا عشان يعرفنا ان الله هو إله أحياء مش إله أموات.

ص4: أنا كده مش فاهم ازاي معلمي الناموس يغلطوا في حاجة مهمة زي كده؟؟

بطرس: أعتقد انهم خلطوا بين مصير الجسد ومصير الانسان نفسه.

ص4: وايه الفرق؟؟

بطرس: شخصية الانسان ..أقصد يعني ” أنت مين؟؟ ” هوه ده اللي بيفرق لأن شخصيتك بتستخدم جسدك، ولما بتموت بتسيب جسدك هنا علي الأرض.. أما في السما فلو كان لينا أجساد هناك هتكون نوعيتها مختلفة عن أجسادنا الأرضية المحدودة.

ص4 : قصدك تقول اننا لما نموت كلنا هنروح السما علي طول وهنبقي مع ربنا؟؟

بطرس: هوا ده اللي حصل مع موسي بس ممكن ميحصلش معاك.

ص4 : معايا أنا بالذات يعني ؟؟ تقصد ايه بالظبط؟؟

بطرس: يسوع اتكلم في الموضوع ده بصراحة وقال كده: ليس أحد يأتي إلي الآب إلابي.

ص1 : الكلام ده معناه ايه بالنسبة لنا؟؟

بطرس: معناه انك لو مصدقتش ان يسوع بس هو الي ممكن يوصلك للسما عمرك ماهتشوف موسي أو ايليا.

ص1: يعني اللي ميأمنش بيسوع ميروحش السما؟؟

بطرس: بالظبط كده.

ص1: بس ده مش عدل.

بطرس: بصراحة ..دا أكتر من العدل بشوية.

ص1: ازاي يعني أكتر من العدل؟؟

بطرس: يسوع جه للأرض كإنسان عشان يموت عن خطاياك، لو أنت عاوز ترفض انه يدفع لك تمن خطاياك يبقي من العدل ان أنت بنفسك تدفع التمن.

ص1 (بصوت مخضوض): يا إلهي!!

ص2: بطرس .. أنت قلت ان المسيح خلاكوا تحتفظوا بالحكاية اللي أنتوا شفتوها علي الجبل دي سر ….من وجهة نظرك هو ليه طلب منكوا كده؟؟

بطرس: هو قال السبب في كده خلال التلات سنين الأخيرة من حياته ، كان دايما بيقول ان “ساعتي لم تأت بعد” ، لو كنت أنا أويعقوب أو يوحنا حكينا للناس اللي احنا شفناه كانوا أكيد هيأخدوه وينصبوه ملك علي اسرائيل بالقوة.

ص2: وليه لأ؟؟ ايه الغلط في انه يبقي ملك؟؟

بطرس: يسوع مجاش هنا عشان يكون ملك أرضي.

ص2: بس معلمي الناموس قالوا ان المسيح لازم يكون ملك؟؟

بطرس : وده غلطة تانية وقعوا فيها …الكتب المقدسة بتقول بوضوح ان المسيح لازم يتألم عن خطايا شعبه وأن المسيح لازم برضه يكون ملك… ومعلمي الناموس افترضوا ان ده هيحصل في نفس الزيارة.

ص3: أنت عاوز تقول ان المسيح لسه هييجي تاني للأرض في زيارة جديدة؟؟

بطرس: هوه دا بالظبط اللي أنا عاوزأقوله…يسوع المسيح هييجي مرة تانية عشان تتحقق النبوات والمرة دي هيملك ويسيطر.

ص1: هل نقدر نقول ان يسوع هو ابن الله فعلا زي ما هو قال ؟؟

بطرس: متهيألي بعد القيامة الموضوع بقي واضح جدا. شكرا لمجيئكم. (يخرج)

تصنيف :