اسكتش عيد القيامة – مريم المجدلية

هذا الاسكتش مترجم من موقع

عدد الصحفيين في هذا الاسكتش يمكن التحكم فيه بحسب الامكانيات.

* تدخل المجدلية إلي قاعة المؤتمرات وهي ترتدي صندل وما يشبه جاكت طويل وغطاء للرأس وتبدو عليها المفاجأة عندما تري زحام من الصحفيين فترتد لتخرج بسرعة وهي تحاول اخفاء وجهها بطرحتها لكن أحد الصحفيين يلاحظها

ص1: لو سمحتي…أنتي مريم المجدلية؟؟

مريم(تلتفت اليه): أيوه أنا ….أنا آسفة مكنتش أعرف انكوا عاملين مؤتمر صحفي هنا.

ص2 : احنا عاوزين نسألك شوية أسئلة عن اختفاء جسد يسوع الناصري ؟؟

مريم : يبقي حضرتك لازم تتكلم مع واحد من التلاميذ …..أنا هنادي لك علي واحد منهم (تحاول الانصراف).

ص2 : بس احنا عاوزينك أنتي.

مريم: أنا ؟؟ أنتوا عاوزيني أنا؟؟

ص2 : لو مكنش عنك مانع يعني؟؟

مريم: بس …بس أنا واحدة ست …مين هيحب يتكلم مع واحدة ست؟؟

ص2: بالعكس …متهيألي حضرتك عندك معلومات كتير مفيدة جدا لينا وأكيد القراء بتوعنا هيحبوا يقروها…لو سمحتي اقفي علي المنصة..(تصعد مريم للمنصة في هدوء وخجل)

مريم: عاوز تعرف ايه؟؟

ص2: عندنا معلومات بتقول انك كنتي أول واحدة اكتشفت ان الجسد مش موجود…هل المعلومات دي صحيحة؟؟

مريم: أيوه …صحيحة.

ص3: ايه رأيك في الكلام اللي بيقوله كبار اليهود عن سرقة التلاميذ للجسد وادعائهم انه قام من الأموات؟؟

م : دا كلام مش حقيقي.

ص3: وايه اللي مخليكي متأكدة انه مش حقيقي؟؟

م: لأني شفت يسوع حي خارج القبر.

ص3 (بصوت مخضوض): ايه؟؟ ………..شفتي مين؟؟

م : شفت يسوع وكان حي مش ميت.

ص3: وايه تفسيرك للموضوع ده؟؟

م : التفسير ….واضح ان يسوع قام من الموت.

ص3: أنتي بيتهيألك انه قام من الموت؟؟

م : أنا متأكدة انه قام من الموت.

ص3 : وايه اللي مخليكي متأكدة بالشكل ده؟؟

م: أولاً قبل ما يموت هو اتنبأ بأنه هيتصلب وهيموت وبعدين هيقوم بعد 3 أيام.

ص3: هو اتنبأ بكده؟؟؟

م: أيوه …قال كده كتير …..أنا كنت فاكرة الموضوع ده معروف للكل.

ص3: مجرد انه اتنبأ بحاجة ده مش معناه انه عملها فعلا.

م: أنا مش فاهمة ليه محدش مصدق انه قام من الأموات مع ان كل البلد عارفة انه قوّم 2 قبل كده من الموت؟؟

ص2: امتي اتنبأ يسوع بأنه هيتصلب وهيقوم من الموت؟؟

م : في مزامير داود الملك مثلا …لما وصف ثقب ايديه ورجليه …..ده كان وصف للصلب.

ص2: بس داود كتب المزمور ده من مئات السنين قبل ما يخترعوا الموت بالصلب ….ازاي ممكن داود ….أو ازاي أي حد ممكن يعرف حاجة عن الصلب قبل ما يخترعوه؟؟

م: مفيش انسان ممكن يعرف الكلام ده …ربنا بس هو اللي يقدر يعرفه.

ص2: بس حضرتك قولتي ان المسيح نفسه اتنبأ بصلبه قبل ما يموت!!!

م : فعلا …فعلا.

ص2: قصدك تقولي ان يسوع كان نبي بيتكلم بكلام الله؟؟

م : أنا بقول ان يسوع هو الله.

ص2: يعني نقدر نقول علي لسانك انك بتأكدي ان يسوع هو الله؟؟

م: ممكن تقول كده علي لسان يسوع نفسه… وده السبب اللي خلي كبار اليهود يعدموه …انه قال ان هو بنفسه “أنا هو” الإله اللي ظهر في العُليقة في العهد القديم.

ص2: معلش …عاوز أتأكد اني فهمت صح…. هل يسوع كان بيدعي ان هو الله؟؟

م : هو مازال بيقول كده ….يسوع حي .

ص2 : بصراحة دا تصريح خيالي ….يسوع دا كان مجرد نجار من الجليل …… ازاي يقدر يكون إنسان وإله في نفس الوقت؟؟

م : الله قادر علي كل شيء.

ص1: وحضرتك مصدقة فعلاً ان يسوع قام من الأموات؟؟

م : أنا شفته بعينيّ …وكمان مسكت رجليه وبوستهم بعد ما قام من الأموات.

ص1 : هو مش حضرتك برضه كان عندك قبل كده مرض نفسي؟؟

م : لو حضرتك عاوز تقول انه مينفعش تعتمدعلي شهادتي بسبب مرضي …تبقي غلطان لأن مرضي كان سببه الشياطين اللي كانت ساكناني واللي يسوع طردهم تماما مني …وأنا دلوقتي عاقلة زي حضرتك بالظبط…

ص1 : بس أنتي عندك أسباب تخليكي تكذبي ….

م(تقاطعه): زي ايه؟؟

ص1 : انك كنتي متجوزة المسيح في السر ودلوقتي أنتي حامل في ابنه؟؟

م: الكلام ده مضحك وكله غلط.

ص1: ممكن تثبتي لنا انك مكنتيش متجوزة من يسوع؟؟

م: فكر معايا كده بالمنطق … أنا ممكن أرد عليك بحاجتين ….ازاي رب الكون كله واللي هو إله المحبة لما هينزل علي الأرض في صورة انسان هيتجوز واحدة وهو عارف انه بعد 3 سنين هيسيبها وهتبقي هي أرملة؟؟!!

ص1 : يعني أنتي لسه مصرة إن يسوع هو الله نفسه؟؟

م : الله قال كتير في الكتب المقدسة إن مفيش مخلص غيره…..والكتب المقدسة نفسها بتقول إن محدش ممكن يهدي الرياح ويسيطر علي الأمواج إلا الله نفسه….ويسوع هدّي الرياح وسيطر علي الأمواج في بحر الجليل ……إزاي بعد كده يبقي عندنا شك انه هو الله؟؟

ص4 : كنتي لسه بتقولي انك ممكن تثبتي بطريقتين انك متجوزتيش المسيح . ايه هي الطريقة التانية؟؟

م : لما كان يسوع علي الصليب اهتم انه يوصي تلميذه يوحنا علي والدته عشان يرعاها ويأخد باله منها ….. لو كان ليه زوجة هتبقي أرملة وطفل قرب يتولد وهيعيش يتيم …مش بيتهيألك برضه إنه كان هيحاول يرتب حد يعتني بيهم؟؟

ص4 : وهو معملش كده معاكي؟؟

م : لأ هو معملش كده …لا معايا ولا مع أي واحدة تانية.

ص3: فيه اشاعة ان حضرتك وباقي النساء اللي اكتشفوا القبر الفاضي راحوا لقبر غلط . عندك تعليق علي الموضوع ده؟؟

م : تعليقين مش تعليق واحد …أولا : كل النساء اللي حضروا الصلب مشيوا ورا الجسد لغاية القبر وقعدنا هناك ساعة علي الأقل لغاية ما الخدم بتوع يوسف القيرواني كفنوا الجسد وعرفنا بالظبط فين القبر. ثانياً: لو احنا كنا رحنا قبر غلط …كان عالأقل قادة اليهود راحوا القبر الصح وطلعوا الجسد عشان يردوا علي قصة القيامة ويهدوها من أساسها لكن هما معملوش كده وكل اللي عملوه انهم طلعوا لنا بالقصة بتاعة سرقة الجسد.

ص1: تقولي ايه للناس اللي بيدّعوا ان يسوع مكنش ميت لما اتدفن وكان مغمي عليه بس وبعد كده فاق وقام؟؟

م : أي حد يقول كده أكيد ميعرفش حاجة عن عقوبة الصلب….الفينيقيين هما اللي اخترعوا الصلب أما الرومان فهما اللي أبدعوا فيه وخلوه وسيلة قتل قاسية ومؤكدة..مش ممكن حد ينزل من علي الصليب وهو حي…. وحتي لو ده كان حصل ويسوع عاش …القانون الروماني بيقول ان ساعتها قائد المئة المسئول عن الصلب لازم يتصلب علي نفس الصليب اللي كان عليه يسوع. يا تري أنتوا شايفين ان ده حصل؟؟

ص1: آآه …..لأ …مش شايفين ده حصل؟؟

م: وعلي فكرة ده برضه نفس الحكم اللي كان هيصدر علي حراس القبر لو ثبت انهم ناموا في وقت خدمتهم…هل أنتوا شايفين أي حراس متعلقين عالصليب؟؟

ص1: لأ ..لأ ..مش شايفين.

ص3 : هل حضرتك متأكدة تماماً إن نفس الشخص اللي بتقولي انه قام من الموت هو يسوع نفسه؟؟ قصدي يعني ان يسوع اتضرب من حراس الهيكل وكمان من جنود الحاكم بيلاطس. دول بهدلوا وشه ونتفوا دقنه . أكيد لما جم يدفنوه كان كتلة لحم علي بعضها …إزاي قدرتي تتعرفي عليه؟؟

م : عرفته لأنه ناداني باسمي ….أنا من الجليل ومحدش خالص في أوروشليم يعرفني و بعدين أنا فضلت 3 سنين أسمع وعظاته ..وأنا عارفة صوته كويس وأقدر أميزه في أي مكان.

ص4: من شوية قلتي إن يسوع اتنبأ عن موته؟؟

م: فعلا …ده صحيح.

ص4: طيب لو كان يسوع هو الله …إزاي يقبل انه ييجي علي الأرض وهو عارف انه هيموت بالشكل ده؟؟

م: هو جه مخصوص عشان كده.

ص4: قصدك انه مات بمزاجه؟؟

م : أكيد.

ص4: وايه اللي يخليه يعمل كده؟؟

م: الذبائح الطقسية اللي بنقدمها في الهيكل بتوضح ان سفك الدم ضروري عشان مغفرة خطايانا، وبدون بذل دم مش هيكون فيه مغفرة لخطايانا، والدم الوحيد اللي يقدر يطهرنا تماما من كل خطايانا كل  حياتنا هو دم يسوع لأنه هو الله خالقنا.

ص4: بس محدش ممكن أبدا يجبرالله انه يعاني ويتألم بالشكل ده…ايه اللي خلاه يعمل كده؟؟

م: لنفس السبب اللي خلاه يخلقنا …انه بيحبنا .

يصمت كل الصحفيين ويبلّموا وتقف هي وتستعد للخروج

م: فيه أي أسئلة تانية؟؟

صمت  تام ………تستدير وتخرج

النهاية

تصنيف :